نوح ياحمام / بقلم / حمدى البوقي
نوح ياحمام
__________
نوح ياحمام نوح
ضى القمر مدبوح
مستنى طلوع الروح
مين عارف؟
ومين موش عارف؟
مين يقدر يقولى؟
مين راح يسمعنى؟
يسمع الصوت الاخرس
النفس المكتوم
والقمره الطارحة
بذر الموات
طرحت عيال
مفيهاش ريحة العيال!!
قبل ماتبتدى غنوة
راح تنتهى الغنوة
من سكة الطلوع
لسكة الرجوع
من حلق الكلام
لصرخة السكات
يفرش الموات
حرير ومقصب
نوره من ضلام
خيوطه من حديد
قصيدة من مجنون
يانازل الطلوع
ياطالع النزول
يامتشعلق على الحيطة
هات لى معاك بيضة
اعلقها على الشباك
واعملها انا قمرة
امسكها وادفيها
يدوب الصفار فيها
حتى طلوع النهار
أشقها نصين
يرمح منها صفار الموات
أكحل بيه عيون العتمة
وأنادي ع العيال
وأرسم هلال
يتكون من جديد
يحبل ضي
يولد قمرة
الناقد
حمدى البوقي
تعليقات
إرسال تعليق